По заокружување на процесот на избор и формирање на Локален младински совет во Општина Велес, тој ја одржа првата конститутивна седница на која членовите избраа претседател и заменик претседател.
За претседателка на Локалниот младински совет е избрана Ања Трајковска, а функцијата заменик претседател, во следниве две години ќе ја извршува Марко Варналиев.
Локален младински совет е тело на локалната самоуправа кое го сочинуваат млади претставници на различни форми на организирање и здружување во Општина Велес. Советот има советодавна и застапувачка улога за прашањата од младински интерес кон локалната самоуправа.
Локалниот младински совет има седум членови и нивниот мандат е две години.
Членови на сегашниот совет се Марко Ангелов, претставник на Фондација „Импакт нет”, Лилјана Андовска, претставник на Фондација за локален развој и демократија „Фокус”, Андреј Божиновски, претставник на Центар на активни граѓани „Активо”, Марко Варналиев, претставник на ОСУ „Јовче Тесличков”, Велес, Теона Гаштарска, претставник на Организација на жените на Општина Велес, Кристијан Мартинов, претставник на Еколошко друштво „Вила зора” и Ања Трајковска, претставник на Организација на жените на Општина Велес.
O.K.
