Со отворањето на експресниот пат Градско – Дреново, како прва делница од новиот пат од Градско кон Прилеп, замира транзитниот пазар во Росоман.
Росоманката Весна Јаневска има 55 години и вели за Локал Актив Вардар дека пазарот што со децении беше атракција за транзитните туристи од земјава и странство, го губи својот сјај со градбата на новиот пат.
„Главно, мислењето на росоманчани е дека со новиот пат Росоман останува слепо црево, бидејќи и приклучокот кон тој пат не ни е директен, туку кај селото Крушевица. Ги нема веќе многубројните тезги со најразлични земјоделски производи и преработки од различни видови зеленчуци и овошја“, истакнува Јаневска.
Таа сепак нагласува дека времињата се менуваат и дека и самите локални производители сакале или не, морале да се навикнуваат на новото време.
„Квалитетот секогаш си го наоѓа својот пат. Како регистрирани земјоделци можеме да ги продаваме своите производи преку интернет, од куќен праг, на манифестации и саеми во земјава и странство. Исто така, имаме идеи и за алтернативни локации на кои во иднина би можеле да ги продаваме нашите производи, исто како што некогаш ги продававме на транзитниот пазар во Росоман“, вели Јаневска.
Вака како што стојат работите, додава таа, од тој пазар засега ќе им останат само убавите сеќавања и фотографиите за спомен.
Р.Л.
