Несовесни лица во Тиквешко крадат делови од каналска мрежа за наводнување и фрлаат отпад во каналите, а сето тоа им предизвикува проблеми како на вработените задолжени за хидромелиоративниот систем, така и на водокорисниците кои користат вода за полевање на земјоделските култури.
„Се крадат делови од државен имот, но и од приватни имоти, кои се неопходни во системот за наводнување во Тиквешко. Се случува да се фрлаат гранки во каналите, било да се тоа гранки од винова лози, или од други овошки, или гранки при сечење на дрвја. Апелираме да се престане со несовесноста бидејќи таа предизвикува штети“, рече директорот Атанас Ризов, раководител на подружницата Тиквеш, на АД Водостопанство, чии простории се наоѓаат во Кавадарци.
Тој потсети дека проблеми имало и во претходната наводнувачка сезона, а несовесните однесувања продолжиле и годинава, пред полевната сезона што започнува на 15 април.
Една таква кражба имале неодамна, кога биле украдени решетки, чија функција е да го собираат отпадот да не влезе во каналите и да не се сопре водата за наводнување. Крадците, подвлече, ризикувале дури и поголеми последици, како што е евентуално кинење на канал, доколку отпад го спречи протокот на вода. Директорот рече дека случајот ќе го пријават и во полиција.
Ризов појасни дека ги исчистиле каналите што обезбедуваат вода за наводнување во неколку општини. Рече дека се спремни за новата сезона и апелираше на совесност, во интерес на сите.
Р.Л.
