Кавадарци е меѓу најзагадените во државата, а нема ниту една казна за загадувач, вака реагираа дел од советниците во Советот на општината на вчерашната седница. Имаше и критики дека малку е направено во изминатите години за решавање на проблемот, кој влијае врз животот и здравјето. Годишниот извештај за амбиентален воздух во општината за 2024 година беше усвоен со мнозинство, но дел од советниците изразија загриженост од состојбата со загадувањето.
Павле Маневски кој е претседател на Комисијата за екологија, кажа дека на вчерашната седница на комисијата побарале да им бидат доставени информации колку и какви глоби биле изречени за детектирани загадувачи на средината од 2021 г. досега, но не добиле одговор.
Градоначалникот Митко Јанчев рече дека секторот за животна средина и екологија активно работел на терен заедно со инспекторатот, службата Мој општинар и други чинители и имале направено многу записници и предупредувања, но немало изречено ниту една глоба. Тој појасни дека ако некој гори нешто сомнително, треба да се детектира во моментот, лабораториски да се докаже во акредитирана лабораторија, па да се поднесе пријава, при што постапката била сложена и додека се истерала до крај, делото можело да застари. Истакна дека се потребни измени во законски решенија, за да има казнивост и спроведливост. Разговарале и со лица кои им правеле проблем на сожители со ваквите дејства. „Кај нив веројатно ќе се оди и репресивно“, рече градоначалникот.
Советникот Круме Богевски рече дека е недозволиво како општина што го има вториот најзагаден воздух во државата, да нема ниту една глоба за загадување на амбиентален воздух.
„Постојат две решенија. Првото се законските измени за кое очигледно нема распложение во централната власт. Второто е Комуналец да добие дозволи за мерење. Општината не смее да го одложува ова и да продолжи тенденцијата ‘банда без команда’ и само со опомени. Не смее да се прикрива проблемот и мора активни мерки. Реаноста е дека општината нема многу направено во намалување на емисијата на штетни честички во воздухот. Не може општината и невладините или било кој друг, да засадат толку многу дрвја за прочистување на воздухот, колку што има несовесни. Во овој случај народот си пати од мали фирмички што мислат дека со заштедување на струја и гориво за загревање би биле збогатени. Но, им се нарушува реномето, а нема многу да заштедат“, коментираше тој.
Советникот Вуко Мелов рече дека параметрите и бројките од извештајот воопшто не се охрабрувачки, имајќи го предвид проблемот низ годините.
„Според мене има неколку причини за тоа. Неповолна е местоположбата на градот во котлина. Но, и други фактори влијаат за состојбата. Непланска градба и затворање на градот, бетонизација, дополнително ги затворија провевите во градот. Имаше низ годиниве и ситни реконструкции на булевари на тротоари и сеча на дрвја. Треба време да се оформат новите зелени површини. За мене е неприфатливо за ситна реконструкција да се исече цел дрворед. Неприфатливо е со толку загаден воздух да нема изречени казни“, подвлече Мелов.
„Станува збор за сериозен проблем, има пратеници од Кавадарци да се покрене иницијатива до парламентот и да се отвори прашањето на централно ниво, во делот на инспекцискиот надзор за да се реши ова прашање бидејќи сериозно влијае врз здравјето и животот“, додаде тој.
Советникот Горан Кузмановски рече дека загадувањето на градот ги засега сите. Тој посочи дека лете е во рамките на дозволеното, а зиме загадувањето било над 90 проценти од затоплувањето во попладневните и особено во вечерните часови. Според него, засадените дрвја и зелени површини имале позитивно влијание. Притоа рече дека проектот најавен за гасификација во најголем дел дека ќе го реши проблемот.
Инспекторот за животна средина Доне Илов рече дека по 24-месечен мониторинг со акредитираната лабораторија Амбикон од Универзитетот „Гоце Делчев“, било согледано дека најголемото загадување доаѓало од загревање со фосилни горива, па од сообраќај и од урбана прашина при движење на возила.
„Инспекциски контроли се вршат постојано. Овие два месеца во координација со државниот инспекторат за животна средина, вршевме контрола на сите сервиси за постапување со отпадно масло. Опфатени беа 35 механичарски работилници и сите беа вклопени во системот за предавање на отпадно масло. Кај нив не беа пронајдени котли за загревање на нафта или масло, бидејќи сите се грееја со плин или печка на дрва, а некои и со клими. До пред три години имаше проблем со постапувачи со отпадно масло, па дел се злоупотребуваше“, појасни тој.
Р.Л.
