Времениот сообраќаен режим во Велес кој траеше два месеца поради запирањето за сообраќај на мостот кај Башино село, ги извади на површина сите проблеми кои ги има градот од 50.000 жители. На средба на бизнисмените со општинските власти, бизнисмените потенцираа дека со враќање на платениот паркинг ќе се намали хаосот во градот, кога пешаците се на улица, а возилата на тротоар.
„Време е да се врати платениот паркинг во Велес. Сите гледаме каква е состојбата. Се узурпираат тротоари, пешаците се на улица. Уште од рано наутро, голем број на велешани кои работат во Скопје ги запоседнуваат паркинг местата од 7, од 8, па до 17 часот. Во овој период тие што имаат потреба нема каде да се паркираат“, истакнаа членови на бизнис-заедницата од Велес.
Општинските советници бараа враќање на зонското паркирање со цел да се растовари сообраќајот низ центарот, посебно во времениот режим кога тешките камиони мора да минуваат низ тесните улици. Но, градоначалникот Марко Колев рече дека изградбата на подземната гаража која наскоро ќе започне, ќе го реши проблемот и дека треба да се почека.
Во Велес постојат 11 јавни паркиралишта со 320 места кои засега се бесплатни. Одлуката да не се наплаќа повеќе паркингот, ја донесе сегашниот Совет на општината на својата прва седница.
Општината има регистрирано 30 илјади возила, на околу 50 илјади жители.
О.К.
