Со воведувањето на целосната забрана за движење во сите шуми и на целото шумско земјиште, се забранува движење и престој во шумските излетнички места меѓу кои спаѓа и популарното излетничко место за светиниколчани – Бареш.
Бареш се наоѓа во ѓуришкиот дел од општина Свети Николе во кој жителите вообичаено се разладуваат во сенките на боровата шума и се дружат со приготвување скара.
Поради зголемена опасност од појава на шумски пожари на отворен простор, Министерството за земјоделство шумарство и водостопанство по барање на ЈП Национални шуми воведе целосна забрана за движење во шумите и на шумско земјиште која ќе трае од 1-ви јули до 31-ви август 2025 година.
Движењето ќе биде дозволено единствено со писмено одобрение издадено од подружницата на ЈП Национални шуми ПСШ „Шумарство“ за подрачјето на општините Свети Николе и Лозово, како што нѐ информираа за Локал Актив Вардар. Издавањето на одобрение ќе биде исклучително за итни и неодложни потреби за движење во шумите и на шумското земјиште.
За непочитување на оваа забрана на физичките лица кои ќе бидат затекнати дека се движат во шума и шумско земјиште, согласно член 106 од Законот за шумите, ќе им биде изречена парична казна од 1500 до 2000 евра.
Р.П.
